Paquito D'Rivera eta Dave Douglas jazzaldian izango dira

• Rhoda Scott, Cécile McLorin eta Joe Lovanorekin batera, jaialdiaren 48. edizioko ordainezko kontzertuen eskaintza osatuko dute.

• Sarrerak eta abonamenduak apirilaren 7tik aurrera salgai egongo dira

Getxo Jazzak abonu kontzertuetarako artisten zerrenda osatu du musika afro-kubatarraren erreferentzia den Paquito D ‘Rivera klarinete- eta saxofoi-jotzaile ezagunaren eta Dave Douglas tronpeta jotzaile estatubatuarraren eskutik. Horiez gain, Rhoda Scott organista, Cécile McLorin abeslaria eta Joe Lovano saxofoi-jotzailea ere jardungo dira Muxikebarri zentroan uztailaren 2tik 6ra, jaialdi bizkaitarraren 48. edizioan. Sarreren eta abonuen salmenta datorren astelehenean, apirilak 7, hasiko da Getxo Kulturako ohiko kanaletan.

Paquito D ‘Rivera (1948, Marianao; La Habana) ezaguna da latin jazzean duen talentuagatik eta musika klasikoko konpositore gisa lortutako lorpenengatik, 14 Grammy sari irabazi dituela. 10 urte baino ez zituela, Kubako Antzerki Nazionaleko Orkestrarekin hasi zen jotzen. Habanako Musika Kontserbatorioan ikasi zuen, eta 17 urterekin Orkestra Sinfoniko Nazionaleko bakarlari aritzen hasi zen. Gainera, Kubako Musika Modernoko Orkestraren sortzaileetako bat izan zen, eta bi urtez zuzendu zuen.

Irakere musika ensemble ezagun eta berritzailearen kide sortzaile eta zuzendarikide izan zenak diskografia zabala du, eta jazzarekiko, beboparekiko eta musika latinarekiko dedikazioa eta gogoa islatzen ditu, musika klasikoari egindako ekarpenak ahaztu gabe. Obra sinfonikoen eta ganbera-musikaren konpositore ospetsua da, eta ‘Aires Tropicales’ haize tresnetarako boskote ospetsua, ‘Conversaciones con Cachao’ eta ‘Gran Danzón’ pieza ospetsuak idatzi ditu. Getxora egingo duen hirugarren bisitan, uztailaren 3an, boskotean arituko da Pepe Rivero (pianoa), Yuvisney Aguilar (perkusioa), Reinier Elizarde “el Negrón” (kontrabaxua) eta Sebastian Laverde (bibrafonoa) lagun dituela.

Bestalde, Dave Douglas tronpeta-jotzailea (1963, Montclair; New Jersey) azken hamarkadetan jazzetik eta inprobisazio musikatik sortu den artista iparramerikar garrantzitsuenetariko bat da. Berrikuntza eta tradizioa uztartzeko duen gaitasunari esker generoaren eszenan espazio paregabea sortu du. Bere musikak, konposizio zehatzaren eta bat-bateko inprobisazioaren artean dagoena, jazzaren ondarea sakon ulertzen eta etorkizunera begira jartzen du. Getxon honako artista hauekin Marta Warelis (pianoa), Nick Dunston (baxua) eta Joey Baron (bateria) biltzen dituen laukotearen gidaritzapean iritsiko da.

Talde Lehiaketa eta gainerako emanaldiak

Ohi bezala, Talde Lehiaketako lau finalistak jardungo dira figura handien aurretik. Aurten Alemaniako, Herbehereetako eta Espainiako talde hauek bilduko dira: Eneko Dieguez Quartet, IMB Special IMB Special 4tet, César Vidal & Artikulation Band eta Paper Moon. Ordainezko kontzertuak 21:00etan hasiko dira Muxikebarrin eta emanaldi hauei ‘Hirugarren Milurtekoa’ ataleko emanaldiak (19:00) eta Algortako Geltokia plazan izango diren familia kontzertuak (13:00) gehitu behar zaizkie. Halaber, Areetako Geltokia plazan ikuskizun ibiltaria egingo da uztailaren 5ean, 18:30ean eta Gauerdiko jam sessions-ek eta marchin’ band baten desfileek borobilduko dute aurtengo ekitaldia.