Nerea Balda San Juan eta Paula Hoyos Gómez, 'Ramiro Pinilla' 8. Eleberri Laburren Lehiaketako irabazleak

• Malen Onandia San Juan eta Inés Sánchez Ordoñoren testuak saritu dituzte haurrentzako ‘Txiki Baskardo’ kontakizun lehiaketan

Gaur, Muxikebarri zentroan, Getxo Kulturak eta Pinillesca kolektiboak bultzatutako ‘Ramiro Pinilla’ Eleberri Laburren Lehiaketaren zortzigarren edizioaren irabazleak jakinarazi dira. Nerea Balda Sanjuanek euskarazko lan onenaren saria eskuratu du eta Paula Hoyos Gómezek gaztelaniazko testu onenari emandakoa. Gainera, Malen Onandia San Juan eta Inés Sánchez Ordoño bertako ikasle gazteak saritu dituzte ‘Txiki Baskardo’ haurrentzako kontakizunen lehiaketan, euskarazko eta gaztelaniazko modalitateetan, hurrenez hurren.

‘Zure arnasa zaintzeko’, euskarazko saria irabazi duen eleberria, Nerea Balda Sanjuanek (Irurtzun, 1975) lana da. Istorio horren bitartez, egileak familia baten unibertsora ez ezik, ezaguna den unibertso batera ere lekualdatzen du publikoa, estilo garden, sentikor, sinesgarri eta umoretsu batekin, pertsonaiekiko enpatia sortzeko gai dena, amaren eta alabaren arteko harreman konplexuak eta nerabezaro hain konplexuaren gorabeherak ulertzeko eta adierazteko gaitasun handia duena. Euskal Filologian lizentziaduna eta Altsasu BHIko euskara irakaslea, egile nafarrak hirugarren aldiz irabazi du lehiaketa hau; izan ere, 2018an ‘Atzerrian’ eleberriagatik lehen edizioko saria eskuratu zuen eta 2022an gauza bera egin zuen ‘Azpimarrak’ lanarekin. 2022. urtean ere, Iruñeko Udalak bultzatutako Euskarazko Sortzaile Berrien Lehiaketaren 27. edizioan ere irabazle izan zen.

Bestalde, Paula Hoyos Gómezek (Aguilar de Campoo, 1992) gaztelaniazko eleberri onenaren saria eskuratu du ‘Dormir fuera de casa’ lanarekin, estilo zehatz eta ia dokumentalista duen kontakizun koralarekin. Egileak, bere istorioan, nahigabe eta gogaituta dagoen gizarte baten norabiderik ezari heltzen dio, atzeratutako hegaldian eta abiatzen ez diren bizitzetan bat egiten duten pertsonaien barruan sakonki sartuz, non ia bidaiari gisa ibiltzen diren. Farmazian graduatua eta Giza Zientzietako ikaslea, Hoyos Bartzelonan bizi da eta testu honekin eleberriaren arloan egin du debuta, nahiz eta aurretik hainbat kontakizun-lehiaketa irabazi dituen, horien artean María de Maeztu Lehiaketa (2023) nabarmentzen delarik.

Zortzigarren edizioa

‘Ramiro Pinilla’ Eleberri Laburren Lehiaketaren azken edizio honetako parte-hartzeak zenbaki onak izan ditu. Guztira, 217 lan jaso dituzte antolatzaileek eta aurkeztutako testuak, ohi bezala, jatorri askotarikoak izan dira: 45 Euskadi eta Nafarroako egileen eskutik, horietako 10 getxoztarrak. Gainerako 162 eleberriak ia erkidego guztietatik bidali dira, eta Madrilgo, Andaluziako eta Kataluniako parte-hartzaileak nabarmendu dira. Haritz Larragetak, Itxaso Martinek eta Irati Jiménezek osatu dute lehiaketaren aurtengo epaimahaia. Ohi bezala, irabazleek 6.300 euroko saria jasoko dituzte. Halaber, euskarazko eleberria Erein argitaletxeak argitaratuko du, Getxo Kulturarekin duen hitzarmenari esker eta, gaztelaniazko testuari dagokionez, beste 1.000 euroko laguntza gehigarria izango du lana argitaratzen badute.

Txiki Baskardo ‘lehiaketa

‘Txiki Baskardo’ haurrentzako kontakizunen lehiaketari dagokionez, Malen Onandia San Juanek, Azkorri Ikastetxeko ikasleak, euskarazko modalitatean jaso du saria, estereotipoak hausten dituen trama indartsu eta hunkigarria duen testu batekin. Istorio horren protagonista beste gazte baten adiskide egiten haur bat da, lehenengoaren aitaren tratu txarren aurrean babesa eta itxaropena emango diona. Formalki ondo garatuta, amaiera poetiko eta itxaropentsu batekin amaitzen da kontakizuna. Bestalde, Inés Sánchez Ordoñok, Europa Ikastetxeko ikasleak, gaztelaniazko lehiaketa irabazi du, itxurak gainditzearen garrantzian sakontzen duen istorioarekin. Kontakizuna ipuin klasikoaren egitura erabiltzeagatik, pertsonaiak eraikitzeagatik eta fantasiaren eta errealitatearen arteko paralelismoagatik nabarmentzen da. Aurtengo edizioan, honako ikastetxe hauetako DBHko 1. mailako ikaslek parte hartu dute: Julio Caro Baroja, Europa Ikastetxea, Aixerrota eta Azkorri.