'Maitasunak' ikuskizuna estreinatuko da Getxon larunbatean, aurten aurreikusita dauden Muxikebarriko bost koproduzioetako lehena
![maitasunak pres1536x1550 maitasunak pres1536x1550](/data/attachments/2024/06/maitasunak-pres1536x1550.jpg)
![maitasunak pres 2400 x 770 Maitasunak Muxikebarri](/data/attachments/2024/06/maitasunak-pres-2400-x-770.jpg)
- Poesia, musika eta dantza batzen dituen ikuskizun honen zuzendaria Adriana Bilbao koreografo dantzaria da
- Zuzendariak berak zenbait egileren olerkiei forma emango die dantzaren bidez, Beñat Achiary kantautorearen ahotsaz eta Raúl Corredoren gitarraz lagunduta
Larunbatean, ekainak 22, ‘Maitasunak’ ikuskizuna estreinatuko da Muxikebarrin, 20:00etatik aurrera. Adriana Bilbao koreografo eta flamenko-dantzariak sortutako ikuskizun lanak artistak berak dantzatutako olerki eta abestien suite bat hurbilduko dio publikoari. Horretarako, Beñat Achiary kantaria (ahots eta zuzendaritza musikala) eta Raúl Corredor gitarrista murtziarra izango ditu alboan dantzariak. Hirukoteak garai desberdinetako olerkarien poema sorta bat taularatuko du, betiere maitasuna ardatz hartuta, eta hiru hizkuntzatan egituratutako gidoiarekin: euskaraz, gaztelaniaz eta frantsesez.
‘Maitasunak’ proiektuarekin, Muxikebarrik urte amaierara arte eskainiko diren bost koprodukzio-sailari hasiera emango dio. Horri ezker, gaur izandako aurkezpenean Irantzu Uriarte Getxoko Kultur Etxeko Presidenteak adierazi bezala, erakunde getxotarrak “beste urrats bat eman nahi du arte eszenikoen sektoreari laguntzeko”. Bestalde, Xabier Paya erakundearen zuzendariak azaldu du horrelako ekimenen bitartez Getxok kulturaren balio-katea osatzen duela, ikuskizunen erakustaldia ez ezik, sorkuntza eta bitartekaritza sustatuz kultura-sektorearekin eta herritarrekin batera. Aurten hasita koprodukzioak gehituko dira Muxikebarriko eskaintzari eta, zentzu horretan, Payak nabarmendu egin du Getxok izan duen hazkunde progresiboa; izan ere, Euskadiko “laugarren kultura hiriburua” bilakatu da, programatutako ikuskizun eta jarduera kopuruari dagokionez.
Oraingo honetan, Adriana Bilbaok eszenaratze xume eta apaindura gutxikoa proposatzen du. Hiru artistek maitasunik inozenteenetatik abiatzen den bidaia egingo dute, pasio-, obsesio- eta ispiritu-sentimenduak zeharkatuz, eta norberaren maitasunean amaituz. 60 minutuko ibilbide hori irudikatzeko, eta tradizio kulturalean eta poeta handietan oinarrituta, zentzumenak estimulatzearen eta edertasunaren indarra gainditzearen aldeko apustua egingo dute sortzaileek. Ikuskizunak euskal kultur tradizioaren sustraiak biziri mantentzen ditu; istorioak, kondairak eta abesti herrikoiak eta, horretarako, Joxean Artze eta Itxaro Bordaren euskal egileen testuez baliatzen da, besteak beste. Horiez gain, Federico García Lorca, Gherasim Luca, San Juan de la Cruz, Teresa de Ávila eta Walt Whitman-en poesia eta bizipenak ere jorratzen ditu, jatorrizko konposizio eta koreografiek aberastuak, flamenkoaren eta sorkuntza garaikidearen artean nabigatzen duen proiektua borobiltzeko.
Talde artistikoa
Adriana Bilbao Zararraonandiak (1987, Bilbo) 2019an jarri zuen martxan bere konpainia, eta orain arte hiru lan ekoitzi ditu, eszenan leku bat egiteko. ‘Burdina/Hierro’, 2019an estreinatua, Beñat Achiaryrekin egin zuten lehen lankidetza da, eta harekin lortu zuten XXIV. Max Sarietarako izendapena, Ikuskizun Berri Onenaren kategorian. 2021ean ÉCLAT abiatu zuen, hainbat kategoriatan ere izendatua izan zena, eta, azkenik, 2022an ‘Zarra’ estreinatu zuen, bere aitonaren, Telmo Zarraonandia ‘Zarra’ futbolari mitikoaren oroimenez. Aldi berean, D8 Sorkuntza Faktoriarekin batera, Bilbon kokatutako dantza-sorkuntzari lotutako zentro bat garatu du, arte horren inguruan komunitate bat sortzeko asmoz.
Beñat Achiaryk (1947, Saint Palais) ibilbide luzea egin du kantautore gisa. Urria taldeko kide ohia, ‘Achiary-Carter-Holmes’ (1986), ‘Temps couché (1997),’ Etage34 ‘(1998) eta’ Voix Basques ‘(2001) lanak kaleratu ditu, besteak beste. Gainera, musika tradizionalen irakaslea da Baionako Kontserbatorio Nazionalean. Azkenik, Raúl Corredor gitarra munduan hasi zen aitaren eskutik, eta trebakuntza zabala osatu du izen handiko artisten eskutik, esaterako Jorge Gómez Raimundo Amador eta Manolo Sanlúcar. Murtziako musikariak musika-proiektu anitzetan parte hartu du, hala nola Raúl Corredor Flamenco Quintet. Horren bitartez jazz mundura flamenko-soinu garaikide batetik hurbildu da eta, horri esker, hainat herrialdetan jotzeko aukera izan du.