Getxo Eszena Kalean 2024

 ‘Getxo Eszena Kalean’ programak arte eszenikoak aterako ditu aire zabalera asteburu honetan hasita

 

Maiatzaren 4tik urriaren 26ra, Kultur Etxearen ekimen berriak diziplina askotariko 16 ikuskizun taularatuko ditu Areetako Geltokia plazan

Asteburu honetan hasiko da Getxo Eszena Kalean, arte eszenikoak kalera eramango dituen Kultur Etxearen programa berria, hain zuzen ere. Adin guztietako publikoari zuzenduta, ekimen horren lehen edizioaren egitarauak 16 ikuskizun hartuko ditu Areetako Geltokia plazan, euskal konpainien eskutik. Ikuskizun horietan, antzerkia, dantza, zirkua, clowna eta musika bezalako modalitate eszenikoak bateratu dira, baita diziplina anitzeko sorkuntzak ere. Lan guztiak 18:30ean antzeztuko dira, maiatzaren 4an eta ekainaren 15ean izan ezik, horietan 21:00etan egingo baitira. Ikuskizun guztietarako sarrera doakoa izango da eta, eguraldi txarra izanez gero, Romo Ikastetxean egingo dira.

Antzezkizunak maiatzeko, ekaineko, uztaileko eta urriko larunbatetan izango dira, eta Maite Guevara konpainiak irekiko du proposamena, etzi, hilak 4, ‘Susto’ lanarekin. Testurik gabeko zirku eta clown lan dibertigarria da hori, beldurrezko atrakzio batean lan egiten duen artista talde bat protagonista duena. Bere bizibidea kolokan dago, langileak laster kaleratuko dituzte jende gutxi etortzen delako eta, horren aurrean, aktoreek ekintzara pasako dira. Hurrengo astean, ‘Agurea, urpekaria eta itsasoa’ (maiatzaren 11n) Hortzmuga Teatroaren euskarazko antzezlanaren txanda izango da. Ozeanoetako isurketak eta sare sozialetan adingabeen gehiegizko erakusketa bezalako gaiak jorratzen ditu lan horrek.

Maiatzeko bigarren hamabostaldian ‘Dale, Ramón! (maiatzaren 18an) eta ‘Sokairera, bidaia’ (hilak 25) izango dira. Lehenengoan, Trapu zaharrak taldeak enpresa baten produktu berritzailea sustatzeko lehiaketa interesgarria proposatzen du: bost izarreko bunkerra. Bigarrenean, Sokaire biolinistak laukoteak musika klasikoaren garai desberdinetan zehar eramango dute publikoa. Barrokotik hasi eta gaur egun arte, musika tresna akustiko eta elektrikoen eta umorearen eskutik, ikuskizun musikal originala aurkeztuko dute.

 

Ekaineko programazioa

Ekainean, bost ikuskizun eskainiko dira. Zirkozaurre konpainiak irekiko du hila ‘Harreman’ ikuskizunarekin (ekainak 1), zirkua eta musika tradizional biltzen dituen testurik gabeko ikuskizuna. Astebete geroago ‘Welcome & Sorry’ (ekainak 8) izango da Getxon, testurik gabeko muntaia zoroa, Ganso & Ciaren eskutik, ‘Hamlet’ ia baliabiderik gabe antzeztu nahi duten bi aktore sutsu protagonista dituena. Hilaren 15ean, Qabalum Kolektiboa hartuko du zikloak, ‘La medida que nos ha de dividir’ aurkezteko. Dantza pieza horrek kezka, ilusioa eta emozio ezberdinak eragiten dizkiguten gaiei buruzko hausnarketa planteatzen du.

Ondoren, 22an, ‘Adabaki’, Bapatean Zirkoa konpainiaren testurik gabeko clown ikuskizuna izango da. Pailazo bikote protagonistak publikoari edozein egoera baikortasunez gainditzeko gaitasuna erakutsiko diote, eta horiek nola dena konpon daitekeen, alde handiak daudenean ere. Azkenik, ekainaren 29an itxiko da ‘Nao-Now-Nau’, zirku eta clown muntaia, itsasoa ahaztu gabe egunerokotasunarekin jarraitu nahi ez duten arrantzale erretiratuen bizitza modu ludiko eta irudimentsuan islatzen duena.

 

Uztaila eta urria

Uztaileko proposamena hilaren 13an hasiko da ‘Ondoloin’ eta ‘Arnas Txiki’ Organiken dantza lanekin. Lehenengoan, ametsen munduan barneratzen gaituzte, eta bigarrenean, arnasketak eragiten dituen sentipen askotarikoen bidaia proposatzen digute. Azken pieza honetarako, aniztasun funtzionala duten pertsonekin lan egin du konpainiak. Hilaren 20an, ‘Ipurbeltz’ euskarazko antzezlanak pertsona ezberdinen arteko elkar ulertzearen aldeko apustua egiten du, antzerkiaren, jolasaren eta zirkuko tekniken bitartez. Eta ekainaren 27an, Bea Larrañagak ‘Bonba bat naiz’ clown eta antzerki ikuskizuna hurbilduko digu, gozotegi berezi batean girotua, non postre zoragarri bat egiten den: Chantilly bonba.

Abuztuan eta irailean etena izan ondoren, Getxo Eszenan urrian itzuliko da lau ikuskizunekin. Urriaren 5ean, Aukeran konpainia ‘Aiurri’ dantzarekin iritsiko da. Dantza pieza honek gure barrua zabaltzeko beharra transmititzen dio publikoari, mugitzeko. Hurrengo astean, urriaren 12an, ‘La kermés del vermú’ antzezlanaren txanda izango da. Antzerki eta musika emanaldia Gorakada Teatroren eskutik. Hilaren 19an niMú konpainiak hartuko du lekukoa, ‘Pausa’ zirku eta clown lanarekin, gure bizi-erritmo frenetikoan gelditzeko beharrari buruz hausnartzen duena, gertatzen dena gertatzen dela. Azkenik, Getxo Eszena Kalean ‘Lanean 75 urte bete arte’ antzezlanarekin amaituko da. Barsanti konpainiaren antzezlan honek populismoei eta erretiro-adinaren luzapenaren inguruko ikuspuntu ezberdinei buruzko hausnarketa egitera gonbidatzen gaitu.

• Ikusi programazio osoa HEMEN